У Салігорскую дзіцячую школу мастацтваў Каляды прыйшлі!

Калядныя віншаванні прайшлі ў зімовым садзе навучальнай установы. Навучэнцы аддзялення «Народная творчасць» у тэатральнай форме распавядалі гасцям пра тое, як калядавалі нашы продкі. Песні, танцы, гульня на народных інструментах. Мерапрыемства атрымалася не толькі відовішчным, але і пазнавальным.

Нашаму аддзяленню шэсць год. І мы з першага года імкнемся да падтрымання традыцый школы. У канцэртнай праграме мы стараемся задзейнічаць усіх дзяцей аддзялення, - распавяла карэспандэнту газеты «Шахцёр» загадчык аддзялення «Народная творчасць» ДУА «Салігорская дзіцячая школа мастацтваў» Аксана Фядзюк, - гэта і вакальнае выкананне, выкананне на музычных інструментах, і харэаграфія - увесь комплекс дысцыплін, якія вывучаюць навучэнцы аддзялення, прадстаўлены на мерапрыемстве. Праграма ўяўляе сабой нейкае абрадавае дзейства. Нашы педагогі знаёмяць дзяцей з даўнімі традыцыямі, а яны ў сваю чаргу становяцца яго ўдзельнікамі.

Мы пазіцыянуем сябе як носьбіты традыцый, - працягвае аповед Аксана Фядзюк, - таму што калі не будзе традыцыі - не будзе нацыi, не будзе культуры  і не будзе ў нас будучынi. Таму вельмі важна захаваць культурную спадчыну продкаў.

Фальклорны гурт «Знiчка» і вакальны гурт «Асалода». Кіраўнікі калектываў: Яніна Шыловіч і Людміла Матанцава - гэта выкладчыкі аддзялення, вакалісты. Варта адзначыць, у гэтым годзе калектыў аддзялення «Асалода» быў прадстаўлены на званне «Узорны». І гэта званне прысуджана.

 - Сцэнарый свята склала педагог Марыя Альховік. Вельмі важна, што ў нас ёсць магчымасць прыцягваць да музычнага афармлення, да акампанементу, педагогаў, якія ў дасканаласці валодаюць інструментамі. Напрыклад, у нас ёсць педагог, які грае на ўсіх духавых інструментах Беларусі, мае адпаведную кваліфікацыю Беларускага дзяржаўнага універсітэта культуры і мастацтваў. Таксама ў нас ёсць педагог, які валодае гармонікамі рознага строю. Гэта Пётр Мельнік. Нягледзячы на ​​пенсійны ўзрост, ён працуе з намі. І дзякуючы гэтаму, захоўваецца пераемнасць, - падвяла вынік Аксана Фядзюк.

«Прыйшла Каляда - адчыняй вароты». У праграме ўдзельнічалі не толькі навучэнцы аддзялення «Народная творчасць». Гледачы, асабліва самыя маленькія, з задавальненнем далучаліся да артыстаў, падпяваючы і скачучы на ​​месцах. А ў завяршэннi свята гасцей чакаў сюрпрыз - пачастунак традыцыйнымі стравамі беларускай кухні, якія прыйшліся даспадобы як дзецям, так і дарослым.

Калядныя вечары працягваюцца. Прыняць удзел у іх можа любы жадаючы. У суботу, 13 студзеня, з 17.00 да 20.00 народныя гулянні пройдуць на цэнтральнай плошчы г. Салігорска. Тэатралізаванае прадстаўленне «Прыйшла Каляда - адчыняй вароты». Гэтым жа вечарам у в. Осава пройдзе абрад «Шчодрык». «Добры вечар - шчодры вечар». Інтэрактыўная дзея «Шчодрык», традыцыі варажбы, традыцыйныя беларускія танцы,  - мерапрыемства абяцае быць цiкавым i вiдовiшчным. У ходзе мерапрыемства прагучаць песні і беларуская народная музыка. Пачатак у 17.00.

Фота аўтара